Pregonta - Incarreraus de s’incarreru. It’est sa língua sarda?
Arrespusta - Fàtzili, est una de is medas línguas chi si fueddant in su mundu.
P - Su sardu est unu dialetu o una língua?
A - Naraus una borta po totus ca su sardu est una língua, una língua diferenti de totu is àteras, tenit una gramàtiga, unu fueddàriu (vocabolario) e una literadura. Fait parti de sa famíllia manna de is línguas romanzas, est a nai is chi benint de su latinu volgari, populari, chi is romanus iant spainau me is medas sartus de s'Europa me is cunchistas insoru. Duncas est una língua sorri de su frantzesu, spanniolu, cadelanu, italianu e aici sighendu.
P - Poita est chi calincunu sighit a ddi nai dialetu?
A - Calincunu at ai inténdiu nai ca su sardu est unu dialetu e no una língua, bolendi nai cun custu ca su dialetu est cosa de pagu contu, de série B faci a una língua che s'italianu o su frantzesu po nai.
No est aici, berus est invècias ca no ddu at diferéntzia intra de dialetu e língua chi no ca sa segunda est unu dialetu chi at tentu sa sorti de bessiri língua po lei e chi po custa arrexoni est ufitziali e prus spainau faci a calisisiat àteru dialetu chi no at connotu sa própiu sorti. S'iat a podi incapas nai ca totu is dialetus de is biddas iant a depi cuncurri in calincuna manera a formai sa língua sarda, arreconnota e ufitziali duncas po lei.
Giai su fatu de intendi ca su sardu no est dialetu de àteras línguas po calincunu de bosatrus at a parri strambecu (strano). S'ant ai nau puru ca su sardu est una língua pòbura de pastoris e messajus, ma no est aici. Is linguistas ant ammostau ca a s'imbressi custas ideas no tenint nisciunu fundóriu scentíficu (nessun fondamento scientifico). Est sceti unu pregiudítziu, stichiu a fortza in d-unu tzertu tempus po chi éssius imparau s’italianu a dannu de su sardu única língua connota de su prus de is sardus de insaras.
P - Ma cumenti est chi nascit sa língua sarda?
A - Cumenti apu nau a primu su sardu benit de su latinu volgari, cussu fueddau de is romanus e portau in Sardínnia giai de su 238 i.C. annu chi iant incarrerau a si ponni meris de s'ísula. Issus fiant abarraus unus 700 annus, finas a su 455. Su essi ísula at fatu de manera chi custa fueddada cun su tempus si siat evólvia cun formas originalis e de seguru oi su sardu est sa língua romanza chi est abarrada prus acanta de su latinu. Tzertu candu is romanus fiant arribbaus iant agatau un'àtera fueddada, seguramenti una língua nuraxina/nuraxesa-púnica ca no si depeus scaresci ca de su Sec. VI i.C is cartaginesus iant incarrerau sa cunchista de s'ísula.