Sa lingua nosta (5ª parti)

Chistionai
Tipo carattere

Pregonta - Ma cali bariedadi de sardu eus a pigai po língua ufitziali, logudoresu o campidanesu?

Arrespusta - Oi in campu nci funt duas propostas:

- sa primu punnat a sceberai una bariedadi única de mesania, chi siat mesana intra de campidanesu e logudoresu-nugoresu; chi iat a essi unu sardu fueddau in cussas biddas lacanantis a is domínius linguísticus campidanesu/logudoresu. Po calincunu linguista che Mariu Puddu funt is fueddadas chi agataus in is biddas de Sòrgono, Samugheo, Atzara, Ortueri, fueddadas chi tenit piessignos, caraterísticas, siat de su campidanesu che de su logudoresu.

- s'àtera invècias narat ca sigumenti custas bariedadis mannas, mancai assimbillantis, funt unu pagheddu tropu diferentis po ndi strantaxai unu standard únicu de mesania chi cuntentit a totu is sardus, proponint de criai duus standards: unu po su logudoresu-nugoresu e unu po su campidanesu. Chi est po cust'úrtima proposta narat ca de su restu est in mesura manna giai diaici ca bastat a biri totu is òperas de literadura prus de totu imprentadas, stampate, in custus úrtimus annus.

 

P - Sa Regioni Sarda ita ndi pènsat?

A - Sa regioni Sarda in su 2006 at detzídiu de umperai una proposta sperimentali, sa LIMBA SARDA COMUNA (LSC), bariedadi única, po is atus ufitzialis in bessida de sa regioni. Unu passu de valori stóricu mannu seguramenti. Sa proposta segundu su prus de is campidanesus e calincunu logudoresus puru, assimbillat tropu a su logudoresu cunsiderendu tropu pagu su campidanesu, dda acusant de essi pagu de mesania cumenti si fut nau a incumintzu. Donniunu si ndi podit fai un'idea andendu-sí a castiai is documentus chi fueddant de sa LSC e sa LSC etotu. Est craru ca su standard, calisisiat standard s'at a sceberai a s’acabbu de custa fasi sperimentali e de batalla, intra de is chi bollint sa LSC aici cumenti est e chi dd’iat a bolli unu pagheddu prus acanta a su campidanesu (unu standard chi pighit diaveras cumenti de arreferimentu is fueddadas de is biddas arremonadas a primu?) ca dda cunsíderat pagu de mesania e chi invècias iat bolli is duus standard, at a balli sceti po su scritu, donniunu at a sighiri a fueddai sa língua de sa bidda sua acanta a s'italianu.

 

P - No est chi agoa ddu at a essi su perígulu de depi arrenuntziai a sa fueddada de sa bidda nosta?

A - No ddu est custu perígulu, torru a nai ca su standard est sceti po su scritu, po fai de manera chi su chi scrieus siat cumpréndiu in totu s’ísula, po ndi fai una língua bandera símbulu de un’identidadi única. De su restu su fatu de tenni un’italianu ufitziali no at strobbau a is dialetus regionalis a sighiri de esisti, pensaus a su sitzilianu, napoletanu, romanescu, etc. Chi si faint is libbrus de scola, ditzionàrius e fueddàrius, custus depint essi totus ugualis, no est chi si potzat fai unu libbru po dónnia suta-bariedadi, pensai sceti a su treu chi nd’iat a nasci. Sena de arremonai is problemas chi iaus a tenni po tradusi in is bariedadis diferentis totu is leis e atus ufitzialis chi s’interessant.